[Found under “No Kalani ‘Kauikeaouli Kamehameha III.'”]
O hanau ka Honua a mole ka honua,
O kokolo ke aa ka weli o ka honua,
O lani weli ka honua o lani Ii,
O holo pu ka mole o uina ke aa,
O hale Kaopulewa ka honua,
O Palinuu ka honua akea ka honua,
O honua ku o honua noho ka honua,
O honua lewa o honua paa ka honua,
Ka honua ilalo,—ilalo nuu ka honua,
O honua a “Kea,” na kea ka honua,
O honua a “Papa,” na Papa ka honua,
O ka hiapo honua a Papa i hanau,
Oia ho—i, o ka honu—a, hanau ka honua,
O ka honua la hoi auanei ko lalo nei la,
Owai la hoi auanei ko luna la?
Owai la, o ka po, aia—aia hoi ha,
“Pala kiohoa i ku ua ka pua koa,
Puai aweawe ula i ka laau,
I ena mai i ke aha kauka huna
I ku puupuu no i ke Kuahine,
Kahe koko koko iole ka ua i ke kula,
Mala ka ili mala wale o ka ilima,
I ka powa haalele ia e ka La,
He oki ua ka hau opu o Kalena,
Ku i ka hono o Lihue newa ka pua—e,
E aloha—e.
Aloha ka pua lena o ua Koolau la,
Ka lana wale iho no i Kanoenoe—a hae,
Noenoe lelehu ka maka o ke kaunoa,
Polenalena ha iluna o ke kukui,
E uwiki kahi ana oia wale no ia,
Newa ae ka maka oia hoi kekahi,
Ua maopu nae ka hanu i ke kupukupu,
Ino i ke kula honi mai kai o Ewa,
U ke kupa, o Puuloa he aha nei—e,
E aloha—e.
He aloha moe lawalu na ka houpo,
I ke ala wale no hihina e au—e, hae.
Na Iouli Kamehameha II.
(Kuokoa, 3/17/1866, p. 2)
