Two mele for Liliu and her garden, Uluhaimalama, 1894.

ONAONA O ULUHAIMALAMA.

Hookahi la nui ua hiki mai
O Uluhaimalama he mala pua
Ua ana pono ia na kapuai
Ka loa a me ka laula
Ua hoolawa ia e na hoa
E kanu a ulu liko a lau
Pua mohala i ke kakahiaka
Puia i ke ala o na pua
Onaona mapuana hanu o ka Panse
Popohe a ka lihilihi weleweka
Pehea iho oe a i ka lehua
Na lehua makanoe o Luupali
Haina mai e ka punohu
Ka pipio a ke anuenue iluna
A oe ana iho kuu makemake
Ka popohe a ka pua poni moi
Kuu pua violeta poina ole
Noho mai i ka malu hoonoenoe
Auhea la pua ohawai
A he pua milimili na ke aloha
Puia onaona ka puana ia
O Uluhaimalama o ka lanakila.

Oct. 11, 1894.

(Leo o ka Lahui, 10/16/1894, p. 2)

Ka Leo o ka Lahui, Buke II, Helu 1050, Aoao 2. Okatoba 16, 1894.

KE KUNI LANAKILA.

Anoai ka anoi i hiki mai
O ka leo poloai io’u nei
Ke kuni kalaunu o Liliulani
Onipaa i ka liko o ke aupuni
E i mai ana ia’u e ike
I ke onaona o Uluhaimalama
Ilaila kuu upu kuu hiaai
I ka ulu wehiwehi o Pauoa
Hui ae na ala me ke onaona
I lei i ohu nou e Kalani
No Liliuokalani i ke kalaunu
Puuwai pili paa me ka lahui
Hoolai na manu o Hawaii
Oo Iiwi Hoohiehie
Kikaha na Iwa hoolailai
Makaleho i ka nani o na pua
He pua i poni ia a paa pono
Me ko lahui o ka maluhia
Maikai ka waihona o ka aina
Aina aloha a ke kupuna
E Laka e Hiku o ke kualono
Hoihoi ia mai na na-e ala
Hanohano nei la o na Lani
Mahalo i ka makua Mana Kahi Kolu
Puia onaona ka puana ia
O Uluhaimalama i ka lanakila

Oct. 11, 1894.

(Leo o ka Lahui, 10/16/1894, p. 2)

Ka Leo o ka Lahui, Buke II, Helu 1050, Aoao 2. Okatoba 16, 1894.